Aldedaincö vá la parora sostignibilité dër de moda y massa gonot vëgnera adorada ma sciöche falzada. Porchël l’unse nos baratada fora cun concretëza. Deach’i fajun ion les coses bun y sciöch’al alda, tl respet de Uma Natöra y de che che ó ciarcé nostes spëises. I sun na picia fabrich dala pasta tles Dolomites, i sun vënt, niora, ciamps y pizes maestoses. I sun artejans dla bona saú y i sun chiló por porté sön mësa valch de frësch y de genuin. Prëibel, tolede y mangede.
Al é n tëmp, le nost, olache döt vá debota. I viun le momënt y i nes conzedun püch a nos instësc, o ma la prescia da vigni de. Nos indere chiriun la calma, n ritm dles cosses manco asvelt, y i nes tolun le tëmp da fá bales, tutres, puncerli, cajincí, spätzle, gnocchi y tortellini aladô dla tradiziun. Ales rezetes ladines ti metunse lapró valch de tirolesc y le gust talian. Savon avisa che le bun nasc ma dal savëi.
Ecomo indô chiló. Ince de ciadëna de produziun cörta, chilometri zero y bla bla bla nen unse assá. Nia deach’al é conzec falá, mo deach’al é conzec strabaciá. Porchël tl chît y zënza soné la gran ciampana, chiriunse fora les mius farines y i mius ingrediënc, i laorun deboriada cun i fornidus che é ince nüsc colaboradus y nosc travert é un: chël dla cualité y nia dla cuantité. Sc’i fajun na spëisa do la tradiziun dl post, spo orunse ester i pröms da la ciarcé. Y spo orunse la partí cun che che vëgn ince da plü dalunc.
Sciöche dit, sunse artejans. Y i un na vijiun globala dl’economia. I tignun sön le bëgnsté dl teritore, i ciarun zoruch tl passé tres nostes rezetes, deach’i cherdun tl’identité di posć y i orun la presservé. Al nes plej l’inovaziun, ch’i adorun da chirí fora les materies prömes y por fá a na manira che nüsc produc sides ciamó mius. I ne tralasciun nia i detais y i orun pité na saú dl post ch’an pó ciarcé ince dalunc da chiló.
Scemia ch’i sun na picia fabrich dala pasta, ti dunse ion la poscibilité ince a restoranc y aziëndes daimpró y dalunc da podëi ciarcé nüsc produc. Porchël sunse arjigná ite da condüje vigni de nüsc produc, te cört tëmp, a che che nes chërda sö y che á vëia de n pü’ de bona saú dales Dolomites. I nes tolun ion le tëmp ch’al ó ester, por ponsé a döt, mo i savun ince da ester asvelc y da fá te cört tëmp. I n’orun pö nia che valgügn se perdes l’ocajiun da ciarcé de bones bales!
Tla jopa o cun brama, nüsc tortellini é tres bogn, deach’ai vëgn fac cun gran cura, chirin fora ma materies prömes de cualité. Da ciarcé.
Spëisa tipica ladina, les tutres cun ciote y soni mësson porvé.
Cun pomodoro, fonguns, smalz y parmesan: chiride os fora sciöch’i orëis i fá jö, nüsc gnoch da soni passenëia cun dötes les saus. Da ciarcé.
Originalmënter vëgni dala Germania meridionala, mo ai é intratan na spëisa dassënn conesciüda te döt le Tirol y Südtirol. I i aprijarëis dessigü.
Ciodí pa se lascé sciampé valch tan de bun? Sc’i ciarcëis nostes fëies da soni, orëise dessigü nen ciarcé ciamó y ciamó. De chël sunse sigüsc.
N’atra spëisa dla tradiziun ladina: i puncerli vëgn fac cun la medema pasta co chëra dles tutres, mo ma cun öna na fëia, che vëgn spo stlüta te na forma de mesalöna. Boniscimi ince sciöche dessert.
La spëisa tiroleja plü conesciüda, les bales é bones da sores, tla jopa o sciöch’an ó les fá jö. Les nostes é boniscimes.
Na maestria ladina ch’i conesciun da pici insö y pro les marënes de familia. I cancí é na spëisa tipica dla tradiziun ladina, cun na forma de mesalöna y na file da spinot. Da nia se lascé sciampé.
Scrí fora le formular y te cört tëmp ciafaraste da nos dötes les informaziuns sön i produc, cosć y tëmps. I n’odun nia l’ora da te conësce.
